Saga fangelsismála á Eyrarbakka lengist

Við þær rannsóknir sem nú standa yfir á þróun byggðar á Eyrarbakka á fyrri tíð kemur ýmislegt fróðlegt í ljós. Lengi hefur verið gengið út frá því að rekstur fangelsis á Eyrarbakka hafi byrjað þegar ríkissjóður keypti spítalabygginguna í Fælu af Landsbankanum og breytti í fangelsi árið 1929.

Á uppdrætti af Stóru-Háeyrihverfinu frá árinu 1888 er lítið hús dregið nokkru vestan við Stóru-Háeyrarbæinn og merkt Fangahús. Þetta hús lét sýslusjóður Árnessýslu reisa vorið 1888 og rak það til ársins 1897 þegar það var tekið niður og annað hús, Fangaklefi, var reist annars staðar á Stóru-Háeyrarlóðinni. Fangahúsið var notað til þess að hýsa sakamenn og gæsluvarðhaldsfanga um skamman tíma meðan á prófunum lögregluréttar Árnessýslu stóðu yfir.

Um Fangahúsið má lesa á Eyrarbakka-vefnum undir Horfin hús.

Til viðbótar hafa bæst við umfjallanir um eftirtalin hús:

• Eyfakot – Hús Jóns Guðmundssonar
• Merkigarður eldri
• Skúmsstaðir – Hús Ebenesers Guðmundssonar
• Stóra-Háeyri – Krambúð Þorleifs Kolbeinssonar